ⵢⵓⵛⴽⴰⴷ ⵓⵍⵜⴰⵖ ⵏ ⵍⵡⴰⵍⴷⵉⵏ ⴰⵡⴰⵔ ⵏ ⵜⴰⵙⵉⵎⴰⵏⵜ ⵏ ⵜⵉⵎⵉⵣⴰⵔ ⵏ ⵡⴰⵄⵔⴰⴱⵏ ⵣⵖ ⵍⵉⵃⵜⵉⵍⴰⵍ (ⴰⴼⴰⵔⴰⵏⵙⵉ, ⴰⴱⵕⵉⵟⴰⵏⵉ ..), ⵉⵍⴰ ⵄⴰⴽⵓⴷⴰⵏ ⵢⴰⵏ ⵍⵃⴰⵎⴰⵙ ⴷⴰⵔ ⵉⵎⴰⴷⴰⵏⵏ ⴰⵄⵔⴰⴱⵏ, ⵜⴰⵙⵙⵓⵜ ⵜⴰⵎⵣⵡⴰⵔⵓⵜ ⵏⵖⴷ ⵎⴰⵎⵎⵓ ⵏⵜⵜⵉⵏⵉ ⵜⴰⵙⵓⵜ ⵏ ⵍⵡⴰⵍⴷⵉⵏ, ⵍⵃⴰⵎⴰⵙ ⴰⴷ ⵉⴼⴽⴰ ⵢⴰⵏ ⵡⴰⵏⴰⵡ ⵏ ⵜⴰⵎⵉⵢⵉⵎⴰⵏⵜ ⴷ ⵓⵏⴰⵔⵓⵣ ⵖ ⵍⴱⵏⵉ ⵏ ⵜⵉⵎⵉⵣⴰⵔ ⴰⵡⴰⵔ ⵏ ⴰⴼⵜⵜⴰⵢ ⵏ ⵎⴰⵔⵔⴰ ⵍⵉⵃⵜⵉⵍⴰⵍⴰⵜ ⵣⵖ ⴰⵎⵓⵏ ⴰⵄⵔⴰⴱ.
ⵖ ⵜⵉⵣⵉ ⵏ ⵙⵜⵜⵉⵏⴰⵜ ⴷ ⵙⴰⴱⵄⵉⵏⴰⵜ ⴱⴰⵢⵏⴷ ⵜⵓⴳⵜ ⵏ ⵜⵉⵎⵓⴽⵔⵉⵙⵉⵏ ⵖ ⵉⵏⴳⵔⴰⵡⵏ ⵢⴰⵏ ⴳⵉⵙⵏⵜ ⵜⵜⴰⵟⴱⵉⵄ, ⵍⵇⴰⵎⵄ ⵏ ⵉⵎⴰⴷⴰⵏⵏ, ⴰⵙⴳⵓⴼⵙⵓ ⴰⴷⴰⵎⵙⴰⵏ, ⵖⴰⵢⴰⴷ ⵎⴰⴷ ⵉⴷⵃⵉⵏ ⵉⵄⵔⵉⵎⵏ ⵙ ⵢⴰⵏ ⵡⴰⵏⴰⵡ ⵏ ⵍⵉⵃⴱⴰⵟ ⵖ ⴰⴽⵛⵓⵎ ⵖ ⵓⴷⵔⴰⵡ ⴰⵙⵔⵜⴰⵏ, ⴰⵛⴽⵓ ⵜⴰⵙⵓⵜ ⵜⴰⵎⵣⵡⴰⵔⵓⵜ ⴷ ⵜⵉⵙⵏⵏⴰⵜ ⵉⵙⵍⵉⵎⵓⵔ ⵖ ⵜⵉⵙⵓⴽⴰ ⴷ ⵉⴼⵔⵓⵔⵉⵏ ⵏ ⵜⴰⵎⴰⵣⵉⵔⵜ, ⴷ ⵎⴰⵢⴰⴷ ⵉⴳⴰ ⴰⴳⴰⵎⴰⵏ ⴰⴷⴰⴼⵏ ⵉⵄⵔⵉⵎⵏ ⵉⵎⵓⴽⵔⵉⵙⵏ ⵖ ⵓⴽⵛⵓⵎ ⵙ ⵜⴰⵙⵔⵜⵉⵜ ⵙ ⵜⴰⵢⴰⴼⵓⵜ ⵏ ⵍⴼⴰⵛⴰⵍ ⴷ ⴰⵙⴳⴷⵓⴷⵉ ⵏ ⵍⴼⴰⵛⴰⵍ ⵖ ⵉⵏⴳⵔⴰⵡⵏ ⴰⵄⵔⴰⴱⵏ, ⵎⴰⵛ ⵓⵔ ⵉⵎⴽⵏ ⴰⵏⵏⵉⵏⵉ ⵓⵔ ⴷⵔⴰⵏ.
ⵉⵇⴷⵔ ⴰⵏⵄⵜⴰⴱⵔ ⴰⵄⵔⵉⵎ ⴰⵍⵓⴱⵏⴰⵏⵉ ⵡⴰⵍⵉ ⴽⵓⵍⵓ ⵉⴷⵔⵓⵙⵏ ⵖ ⴰⵍⵜⴰⵖ ⵖ ⵉⵎⵓⵍⵍⵉⵏ ⵉⵙⵔⵜⴰⵏⵏ, ⴷ ⵓⵔ ⵉⵎⴽⵏ ⴰⴷ ⵏⵄⵎⵉⵎ, ⵙ ⴰⵎⴷⵢⴰ ⵉⵎⵓⵍⵍⵉⵏ ⵏ ⴰⵙⴳⴷ ⵍⵉ ⵉⵙⵎⵓⵔⵙⵏ ⵜⴰⵙⵔⵜⵉⵜ ⵖ ⵍⵓⴱⵏⴰⵏ ⴰⵔ ⵏⵜⵜⴰⴼⴰ ⵜⵓⴳⵜ ⵏ ⵉⵄⵔⵉⵎⵏ ⴽⵛⵎⵏ ⴷⵉⵙⵏ, ⵎⴰⵛ ⵉⴽⴰⴱⴰⵔⵏ ⵢⴰⴹⵏⵉⵏ ⵉⴷⵔⵓⵙ ⵎⴰⴷⴷⵉⵙⵏ ⵉⵍⵍⴰⵏ ⴰⵛⴽⵓ ⴼⵛⵍⵏ ⵖ ⵍⴱⵏⵉ ⵏ ⴰⵎⵓⵔ ⵉⴳⴰⵏ ⴰⴳⴳⴰⴹ, ⵉⴳⴰ ⵎⵓⵜⴰⵡⴰⵇⴰⵄ ⴰⵢⴳ ⵍⵓⴱⵏⴰⵏ ⴰⵢⴳ ⴰⴳⴳⴰⴹ, ⴷ ⵉⵎⵓⵍⵍⵉⵏ ⵉⵙⵔⵜⴰⵏⵏ ⵉⵍⵍⴰ ⵢⴰⴷⵍⵉ ⴼⵍⴰⵙⵏ ⴰⴷ ⵙⵓⵡⵔⵉⵏ ⵖ ⵓⴱⵓⵖⵍⵓ ⵏⵙ ⴷ ⴰⴷⴰⴼⵏ ⵉⵣⵎⵣⵣⴰ ⵏ ⵜⴰⵡⵔⵉ ⵉ ⵜⴰⵔⵡⴰ ⵏⵙ, ⴷ ⴰⴷⴰⴼⵏ ⵢⴰⵏ ⵡⴰⵎⴰⵣ ⵏⵖⵔ ⵎⵉⴷⵏ ⵏⵙ, ⴰⵛⴽⵓ ⵉⵎⵓⵍⵍⵉⵜⵏ ⵖ ⵍⵓⴱⵏⴰⵏ ⴷⴰⵔⵙ ⵢⴰⵜ ⵜⵉⵍⴰⵍⵜ ⵉⵏⴰⵃⵢⴰⵏ ⴼ ⵉⵎⵓⵍⵍⵉⵏ ⵢⴰⴹⵏⵉⵏ ⵍⵉ ⵉⵍⵍⴰⵏ ⵖ ⵜⵉⵎⵉⵣⴰⵔ ⵢⴰⴷⵏⵉⵏ ⴰⵛⴽⵓ ⵎⴰⵖⵏ ⴱⴷⴷⴰ, ⴷ ⵎⴰⵢⴰⴷ ⵓⵔⴰ ⵉⵜⵜⴰⵡⵉ ⵙ ⵎⴰⵏⵉ ⴷ ⵓⵔⴰⴷ ⵜⵜⴰⴼⴰⵏ ⴰⴼⵙⴰⵢ ⵉ ⵜⴰⵙⵙⴰⵙⵉⵏ ⵏ ⵜⴰⴷⴰⵎⵙⴰ ⴷ ⴰⵣⵡⴰⴳ ⴷ ⵉⵣⵎⵣⵣⴰ ⵏ ⵜⴰⵡⵔⵉ, ⴷ ⵓⵔⴰ ⵜⵜⴰⴼⴰⵏ ⵜⵉⵡⵉⵣⵉ ⵜⴰⴷⵖⵔⴰⵏⵜ ⴷ ⵜⴰⴳⵏⵙⵜ, ⵉⵎⵓⵍⵍⵉⵏ ⴼⵛⵍⵏ ⵖ ⴰⴷ ⴱⵏⵓⵏ ⴰⵎⵓⵔ ⵉⴳⴳⴰⵏ ⴰⴳⴳⴰⴹ, ⵍⵉⵙ ⵥⵓⵥⴹⵏ ⵜⴰⵔⵡⴰ ⵏⵙ, ⵙ ⵖⵉⴽⴰⴷ ⵉⵇⴷⵔ ⴰⵏⵏⵉⵜⵉ ⴰⴼⵔⴷⵉⵙ ⵏ ⵉⵄⵔⵉⵎⵏ ⵖ ⴰⵍⵜⴰⵖ ⵖ ⵉⵎⵓⵍⵍⵉⵏ ⵉⵙⵔⵜⴰⵏⵏ, ⴷ ⵓⵔⴷ ⵖ ⴰⵙⵓⵡⵔⵉ ⴰⵙⵔⵜⴰⵏ ⵙ ⴰⵎⴰⵖⵏⵓ ⴰⵎⴰⵜⴰⵢ, ⵉⵡⴰ ⵉⵎⵔⵙⵉ ⵔⴰⴷ ⵉⵃⵜⵜⴰⵊⴰ ⵉⴷⵣ ⵃⴰⵇⴰⵏ ⴰⵢⴳ ⵍⵄⴰⴽⵙ (ⵖ ⵜⴰⵙⵏⴰⵎⵓⵏⵜ ⴰⵔ ⵏⵜⵜⵉⵏⵉ ⵎⴰⵙⴷ ⵔⵓⵎⴰ ⵣⵖ ⴰⴼⵍⵍⴰ ⵏⴰⵃⵢⴰⵜ ⴷ ⵔⵓⵎⴰ ⵉⴳⵉ ⵏ ⵓⴱⴰⵔⴰⵣ) ⵙ ⵖⵉⴽⴰⴷ ⵍⵉⵎⵓⵔⴰⵜ ⵖ ⵓⴱⴰⵔⴰⵣ ⵏⴰⵃⵢⴰⵜⵏⵜ ⴼ ⵜⵉⵎⵥⵕⵉⵜ ⵏⵖ ⴼ ⵍⵉⵎⵓⵔⴰⵜ.
ⵖ ⵜⴰⵏⴰⵢⵜ ⵉⵏⵓ ⴰⵙⵜⴰⵍ ⴰⴷ ⵓⵔ ⵉⵚⵃⴰ ⴷ ⴰⵏⵥⴰ ⵏ ⵎⴰⵢⴰⴷ ⵖⴰⵍⵉ ⵉⵊⵊⵔⴰⵏ ⵖ ⵉⴳⵔⴰⵡⵍⴰⵜⵏ ⵏ ⵡⴰⵄⵔⴰⴱⵏ ⴷ ⵉⵎⵓⵙⵙⵓⵜⵏ ⵖ ⵍⵓⴱⵏⴰⵏ, ⵉⵄⵔⵉⵎⵏ ⵏ ⵡⴰⵄⵔⴰⴱⵏ ⴰⵔ ⵉⵜⵎⵓⵙⵙⵓ ⵉⵖ ⵢⵓⴼⴰ ⵎⴰⴷ ⵉⵍⵍⴰ ⵓⵏⴰⵎⴽ ⵉ ⵓⵎⵓⵙⵙⵓ ⵏⵙ ⴷ ⵉⴳⴰ ⴰⵎⵍⵜⴰⵖ ⵖ ⵜⴰⵙⵔⵜⵉⵜ, ⴷ ⴰⵎⵓⴽⵔⵉⵙ ⵓⵔ ⵉⵍⵍⴰ ⵖ ⴰⵍⵜⴰⵖ ⵏ ⵉⵄⵔⵉⵎⵏ ⵖ ⵜⴰⵙⵔⵜⵉⵜ ⵎⴰⵛ ⵖ ⵍⴱⵉⵏⵢⴰⵡⵉⵢⴰ ⵏ ⵓⵏⴳⵔⴰⵡ ⴰⵙⵔⵜⴰⵏ ⵖ ⵍⵓⴱⵏⴰⵏ.
