ⵉⴳⵓⵜ ⵎⴰⵖⴰ ⵏⵙⴼⵍⵉⴷ ⵎⴰⵙⴷ ⵉⵄⵔⵉⵎⵏ ⴰⵢⴳⴰⵏ ⵉⵎⵙⵏⴼⵍⵓⵍⵏ ⵏ ⵓⵣⴽⴰ ⴷ ⴰⵏⴰⵔⵓⵣ ⵏ ⵉⵎⴰⵍ ⵏⵖⴷ ⵉⴱⵏⴰⵢⵏ ⵏ ⵜⴰⵙⵓⵜⵉⵏ ⴷ ⵜⵓⴳⵏ ⵏ ⵉⵡⵏⴰⵏ ⵍⵉ ⵉⵙⵔⵓⵙⵏ ⵉⵄⵔⵉⵎⵏ ⵖ ⵓⴳⵉⵍⵏ ⵏ ⵉⵎⴰⵍ ⴷ ⵉⵜⵜⵉⵏⵉⵏ ⵣⵖ ⴰⵎⵉⵍⴰⵏ, ⵎⴰⵛ ⵎⴰⵔⴰⴷ ⵉⵊⵔⵓ ⵉⵖ ⴳⵉⵙⵏ ⵏⵣⵔⴰ ⵉⵎⵙⵏⴼⵍⵓⵍⵏ ⵏ ⵖⴰⵚⴰⴷ ⴷ ⵏⵙⴽⵔ ⴳⵉⵙⵏ ⵉⵎⴰⴷⵔⴰⵡⵏ ⵖ ⴰⵎⵉⵍⴰⵏ ⵖ ⴰⵎⵓⴷⴷⵓ ⵏ ⴰⵙⵏⴼⵍⵓⵍ ⵏ ⵉⵎⴰⵍ ⵍⵉ ⵙⴰ ⵜⵡⴰⵔⴳⴰⵏ ⴷ ⵍⵉ ⵥⵓⵥⴹⵏ?
ⵉⴼⵓⵖⵜ ⵛⴽ ⵎⴰⵙⴷ ⵉⵄⵔⵉⵎⵏ ⴷⴰⵔⵙⵏ ⵢⴰⵜ ⵜⵉⵍⴰⵍⵜ ⴱⴰⵀⵔⴰ ⵉⵙⵜⴰⵡⵀⵎⴰⵏ ⵖ ⴽⴰⵢⴳⴰⵜ ⴰⵎⵓⵏ, ⴰⵛⴽⵓ ⴰⵔ ⵜⵎⴰⵖⵏⵓⵏ ⵢⴰⵜ ⵜⴰⵙⵉⵍⴰ ⵉⴳⴰⵏ ⵍⵙⴰⵙ ⴷ ⴰⵙⵖⵍ ⵎⵇⵓⵔⵏ ⵖ ⴰⵙⵎⵉⵍ ⵏⵙ, ⴷ ⴳⴰⵏ ⴱⵟⴰⴱⵉⵄⵜ ⵍⵃⴰⵍ ⴰⵙⵎⵉⵍ ⵍⵉ ⵢⵓⴼⵏ ⴷ ⵅⵜⴰⵍⵉ ⴷⴰⵔ ⵜⵉⵙⵓⴳⴰⵔ ⵓⴳⴳⴰⵔ ⴷ ⵅⵜⴰⵍⵉ ⵉⵣⴷⴰⵔⵏ ⴼ ⵜⴰⵏⴽⵔⴰ ⵏ ⵡⴰⵎⵓⵏ ⴷ ⴰⵙⵙⴷⵓⵙ ⵏ ⵜⵉⵍⴰⵍⵜ ⵏⵙ ⴷ ⴰⵜⵉⴷⵉ ⵜⴰⵙⵉ ⵖ ⴽⴰⵢⴳⴰⵜ ⴰⵖⵯⴷⵉ ⵖⵉⵍⵍⴰ, ⵎⴽⵏⵏⴰ ⵉⴳⴰ ⴰⴷⴰⵎⵙⴰⵏ ⵏⵖ ⴰⵏⴰⵎⵓⵏ ⵏⵖ ⴰⴷⵍⵙⴰⵏ ⵏⵖ ⴰⴽⴽ ⴰⵙⵔⵜⴰⵏ.
ⵉⴳⵔⴰⵏ ⵍⵉⵖ ⴱⴷⴷⴰ ⵜⵓⵃⵔⴰⵎⵏ ⵉⵄⵔⵉⵎⵏ ⴼ ⵜⵓⴳⵜ ⵏ ⵉⵙⵔⴰⴳⵏ, ⵙⵡⴰ ⴰⵎⵓⵏ ⴰⵜⵏ ⵉⵜⴼⵔⴰⴹⵏ, ⵏⵖⴷ ⵉⵙⵔⴰⴳⵏ ⵍⵉ ⵓⵔ ⵉⵍⵍⵉⵏ ⵖ ⵉⵅⴼⴰⵡⵏ ⵏ ⵉⵄⵔⵉⵎⵏ, ⴷ ⵉⵜⵓⵇⵚⴰⴷ ⵖⵉⴷ ⵙ ⵉⵄⵔⵉⵎⵏ ⵉⵔⴳⴰⵣⵏ ⴷ ⵜⵉⵎⵖⴰⵔⵉⵏ ⵙⴰⵙⵡⴰⵜⵏ, ⴷ ⵉⵄⵔⵉⵎⵏ ⵉⴳⴰ ⵢⴰⵜ ⵜⴰⴳⵓⵔⵉ ⵍⵉ ⵜⵜⵉⵏⵉⵏ ⵉ ⵢⴰⵜ ⵍⵎⴰⵔⵃⴰⵍⴰ ⵜⴰⵡⵜⴰⵏⵜ ⵜⴳⴰ ⵉⵅⴼ ⵏ ⴰⵣⵎⴰⵔ ⴷ ⴰⵎⵓⵙⵙⵓ ⵏⴳⵔ ⵎⴰⵔⵔⴰ ⵉⵙⵡⵉⵔⵏ ⵏ ⴰⵡⵜⴰⵢ ⴷⴰⵔ ⵓⴼⴳⴰⵏ,
ⵎⴰⵛ ⵖ ⵜⵉⵣⵉ ⵢⴰⴷ ⵉⴳⴳⵓⵔⴰⵏ ⴷ ⵙ ⵓⵣⵓⴳⵉⵣ ⵏ ⵜⵓⴷⵔⵜ ⵏⵣⵔ ⴰⵣⵣⵓⴳⵣ ⵎⵇⵓⵔⵏ ⵖ ⵜⴰⵎⴷⵔⴰⵡⵜ ⵏ ⵉⵄⵔⵉⵎⵏ ⵖ ⵜⵓⴷⵔⵜ ⵜⴰⵙⵔⵜⴰⵏⵜ ⴷ ⴰⵙⴽⴰⵔ ⵏ ⵜⴰⵖⵜⴰⵙⵜ, ⴷ ⵉⵍⵍⵉⵏ ⵜⵓⴳⵜ ⵏ ⵉⵙⵔⴰⴳⵏ ⵜⵓⵊⵊⴰ ⵎⴰⵢⴰⴷ ⴰⴷ ⵉⴳⴳⵣ, ⵣⵖ ⵉⵙⵔⴰⴳⵏ ⴰⴷ ⵍⵉ ⵉⵜⴰⵡⵉⵏ ⴰⵔⴷ ⵓⵔ ⵏⵅⴰⵔⵟⵏ ⵉⵄⵔⵉⵎⵏ ⵖ ⵜⵓⴷⵔⵜ ⵜⴰⵙⵔⵜⴰⵏⵜ ⵖ ⵓⵎⵏⵉⴷ ⵏ ⴰⵎⵓⵏ:
- ⵓⵔ ⵙⵙⵏ ⴱⴰⵀⵔⴰ ⵉⵣⵔⴼⴰⵏ ⵏⵙⵏ ⴷ ⵜⵉⵍⴰⵍⵉⵏ ⵜⵉⵙⵔⵜⴰⵏⵉⵏ ⵏⵙⵏ, ⵙ ⵜⵖⴰⵔⴰⵙⵜ ⵢⴰⴹⵏⵉ ⴰⵏⵖⵓⴱⵓ ⵏ ⵜⵉⵍⴰⵍⵜ ⵜⴰⵏⴰⵎⵓⵏⵜ ⵖ ⴰⵙⴼⵔⴽ ⵙ ⵍⴰⵀⵎⵉⵢⴰ ⵏ ⵓⴽⵛⵓⵎ ⵙ ⵜⵓⴷⵔⵜ ⵜⴰⵙⵔⵜⴰⵏⵜ.
- ⴰⵏⵖⵓⴱⵓ ⵏ ⵜⴰⵎⴰⴼⴰⵡⵜ ⵖ ⵉⵙⵍⴳⵏⵏ ⴷ ⵎⴰⵙ ⵓⵔ ⵕⵚⵉⵏ, ⵣⵖ ⴳⵉⵙ ⵓⵔⴷ ⵥⴳⵉⵣⵏ ⴰⵡⵜⴰⵢ ⵏ ⵓⵙⵜⴰⵢ ⵙ18 ⵏ ⵓⵙⴳⴰⵙ, ⵙ ⵖⵉⴽⴰⴷ ⵎⴰⵎⵏⴽ ⵙ ⵔⴰⵢⵜⴰⵀⵍ ⵓⵄⵔⵉⵎ ⵖ ⵓⵙⴳⴰⵙ ⵏⵙ ⵡⵉⵙ18 ⵎⴰⵛ ⵓⵔⴷⴰⵔⵙ ⴰⵣⵔⴼ ⴰⴷ ⵉⵙⵜⵉ ⵏⵖⴷ ⴰⵢⴼⴽ ⴰⵖⵔⴷ ⵏⵙ ⵉⴼⴽ ⵜⴰⵏⴰⵢⵜ ⵏⵙ ⵏⵖⴷ ⵜⴰⵖⵜⴰⵙⵜ ⵏⵙ ⵜⴰⵙⵔⵜⴰⵏⵜ!
- ⴰⵅⵛⴰⵏ ⵏ ⴰⵙⵓⵔⵙ ⴰⴷⵎⵙⴰⵏ ⴷ ⵜⵓⵙⵓⵔⵜ ⵏⵙ, ⵖⴰⵍⵉ ⵉⵜⵜⴰⵊⴰⵏ ⵜⵓⴳⵜ ⵏ ⵉⵄⵔⵉⵎⵏ ⵓⵔ ⵉⵣⴷⴰⵔ ⴰⴷ ⵉⴷⵔⵓ ⵖ ⴰⵙⴽⴰⵔ ⵏ ⵜⴰⵖⵜⴰⵙⵜ ⴷ ⴰⵔ ⵏⵜⵜⴰⴼⴰⵜ ⵎⴰⵙⴷ ⵎⴰⵔⵔⴰ ⵍⵉⵀⵜⵉⵎⴰⵎ ⵏⵙⵏ ⵉⴳⴰⵜ ⴰⵙⵡⵉⵏⴳⵎ ⵖ ⵓⵣⵡⴰⴳ ⵏⵖⴷ ⴰⵛⵏⵓⴱⵛ ⵙ ⴽⵔⴰⵏ ⵜⴰⵡⵔⵉ ⵍⵉ ⵔⴰⵜⵏ ⵉⵃⴹⵓ ⵖ ⵜⴰⵎⵏⵜⵔⵜ ⴷ ⵜⴰⴷⴰⵍⵍⵉⵜ, ⴰⵛⴽⵓ ⴰⵙⵔⴰⴳ ⴰⴷⵎⵙⴰⵏ ⵉⴳⴰ ⵢⴰⵏ ⴰⵙⵔⴰⴳ ⴱⴰⵀⵔⴰ ⵉⵙⵜⴰⵡⵀⵎⴰⵏ ⴷ ⵓⵔⵉⵎⴽⵏ ⴰⵜⵏⵣⵔⵉ ⵏⵖⴷ ⴰⵜ ⵏⵄⵜⴰⴱⵔ ⴰⵏⵎⵎⴰⵍ ⵎⵣⵉⵏ ⵏⵖⴷ ⵉⵣⴰⵢⴷⵏ.
- ⵡⴰⵔ ⵜⴰⴳⵯⵎⴰⵏⵉⵜ ⴷ ⴰⵛⵏⵓⴱⵛ ⴷⵉⵎⴰ ⴼ ⵜⴰⵎⴰⴳⵉⵜ, ⴷ ⵃⴰⵇⴰⵏ ⵜⵉⵍⴰⵡⵜ ⵍⵉ ⵉⵜⵜⴷⵔⵏ ⴷⴰⵔⵙ ⵢⴰⵜ ⵜⵓⵙⵓⵔⵜ ⵉⴳⴰⵏ ⵜⴰⵙⵎⵢⴰⵜⴰⵢⵜ, ⴰⵛⴽⵓ ⴰⵔⴼⵍⴰⵙⵏ ⵉⵜⴼⵔⴰⴹ ⴷⵉⵎⴰⵏ ⴰⵙⵢⴰⴼⴰ ⵙ ⵜⴰⵔⵡⵍⴰ ⵣⵖ ⵜⵉⵍⴰⵡⵜ ⵏⵖ ⴰⴼⵓⵖ ⴳⵉⵙ.
- ⵡⴰⵔ ⵜⴰⵎⵢⵉⵎⴰⵏⵜ ⵏ ⵉⵄⵔⵉⵎⵏ/ⵜⵉⵄⵔⵉⵎⵉⵏ ⵙ ⵜⴰⵥⵥⵉⴷⵔⴰ ⵏⵙⵏ ⵖ ⵓⵙⵏⴼⵍ, ⴷ ⴰⵡⵙⴽⴰⵔ ⵏ ⵓⵙⴱⵓⵖⵍⵓ ⴷ ⵜⴰⴳⵔⴰⵡⵍⴰ ⵜⴰⵏⴰⵎⵓⵏⵜ.
- ⵉⴳⴰ ⵓⵙⴳⵎⵉ ⴷ ⵜⴰⵙⵏⴽⵔⵜ ⵜⴰⵏⴰⵎⵓⵜ ⵢⴰⵏ ⵓⵙⵔⴰⴳ ⴱⴰⵀⵔⴰ ⵉⵙⵜⴰⵡⵀⵎⴰⵏ ⴷ ⵉⵥⵍⵉⵏ ⵖ ⵓⵙⵡⵉⵔ ⴰⵊⴰⵏⴷⴰⵔⵉ, ⵜⵓⴳⵜ ⵏ ⵍⴱⴰⵢⴰⵏⴰⵜ ⵓⵔⴰ ⵜⴰⵎⴰⵏⵏ ⵙ ⵜⵉⵍⴰⵍⵜ ⵏ ⵜⵉⵎⵖⴰⵔⵉⵏ ⴷ ⵜⵉⴼⵔⵅⵉⵏ ⵖ ⴰⵚⵡⴰⴳ ⴷ ⴰⵡⵙⴽⴰⵔ ⵏ ⵜⴰⵖⵜⴰⵙⵜ, ⵖⴰⵍⵉ ⵉⵜⵜⴰⵊⴰⵏ ⵜⵉⵍⴰⵍⵜ ⵏⵙⵏ ⵜⵜⵉⵃⵓⴷⴷⴰ ⵙ ⵉⵡⵜⵜⴰ ⵏ ⵡⴰⵎⵓⵏ ⵉⵖⵓⵔ ⴷⴰⵔⵙ ⴰⵙⴷⵓⵙ ⵣⵖ ⴷⴰⵔ ⴰⵎⵓⵏ ⴷ ⵜⴰⵡⵊⴰ, ⴷ ⵎⴰⵢⴰⴷ ⵙⵓⴳⴰⵢⵓⵏⵙ ⵉⴳⴰ ⴹⵓⵍⵎ ⵉ ⵜⵉⵎⵖⴰⵔⵉⵏ.
ⵉⵙⵜⴰⵡⵀⵎⴰ ⵖⴰⵚⴰⴷ ⴰⵏⴰⵎⵏ ⵖ ⵜⵉⵍⴰⵍⵜ ⵏ ⵉⵄⵔⵉⵎⵏ ⴷ ⵜⵉⵙⵓⴳⴰⵔⵉⵏ ⵏⵙⵏ/ⵜ, ⴷ ⴰⵜⵙⴼⵍⴷⵜ ⵉ ⵜⴰⵏⴰⵢⵉⵏ ⵏⵙⵏ/ⵜ ⴷ ⵜⵉⵙⵡⵉⵏⴳⵉⵎⵉⵏ ⵏⵙⵏ/ⵜ ⴰⴼⴰⴷ ⴰⴷ ⵟⴱⵇⵏⵜ ⴷ ⴰⴷⵣⵔⵏ ⵜⵉⴼⴰⵡⵜ, ⴰⵛⴽⵓ ⵉⵄⵔⵉⵎⵏ ⵖ ⵜⵉⵣⵡⴰⵔ ⵏ ⴰⵢⴳ ⴰⵏⴰⵔⵓⵣ ⴷ ⵉⵎⴰⵍ ⴳⴰⵏ ⵉⵏⵎⵓⵔⴰⵏ ⵏ ⵖⴰⵚⴰⴷ ⴷ ⵉⵎⴷⵔⴰⵡⵏ ⵖ ⵜⵓⴷⵔⵜ ⴷ ⴰⵡⵙⴽⴰⵔ ⵏ ⵜⴰⵖⵜⴰⵙⵜ.
