ⵖ ⵓⵙⴽⵍⵓ ⵏ ⵜⴰⵡⴰⵜⵓⵔⴰⵜ ⴰⴷ ⵍⵉ ⵖⴰⵜⵣⵔⴰⵢ ⵍⵓⴱⵏⴰⵏ ⴷ ⵉⵙⴱⴰⵇⴰⵢⵏ ⵍⵉ ⵢⵓⵜⵏ ⵎⴰⵔⵔⴰ ⵉⵙⵡⵉⵔⵏ, ⵀⴰⵢⴰⵖ ⵖⴰⵙⵙⴰⴷ ⵣⵓⵏⴷ ⵡⴰⴷ ⵉⴳⵉⵡⵔⵏ ⵖ ⵍⴽⵓⵔⵙⵉ ⵏ ⵙⵉⵏⵉⵎⴰ ⴰⵔⵉⵜⵇⵍ ⵙ ⵜⵉⴳⵉⵔⴰ ⵏ ⵍⴼⵉⵍⵎ ⵍⵉ ⴷⴰⵔ ⵙⵉⵏⴰⵔⵢⵓ ⵉⴳⴰⵏ ⵎⵓⵜⴰⵡⵇⴰⵄ ⴷ ⵉⴳⴰ ⵖⴰⵔ ⴰⵍⵍⴰⵙ.
ⵖ ⵓⵙⴽⵍⵓ ⵏ ⵍⴰⵣⴰⵎⴰⵜ ⵍⵎⵓⵜⴰⵜⴰⴱⵉⵄⴰ, ⴷ ⴰⵡⴰⵔ ⵏ ⵍⵉⵏⵀⵉⵢⴰⵔ ⵏ ⴰⵏⴳⵔⴰⵡ ⴰⵥⵕⴼⴰⵏ, ⴷ ⵜⴰⴹⴰⵀⵡⵔ ⵏ ⵍⵄⵓⵎⵍⴰ ⴷ ⴰⴼⵜⵜⵓⵢ ⵏ ⵡⴰⵜⵉⴳ ⵏⵙ ⵙ ⵢⴰⵏ ⴰⵎⴰⵖⵏⵓ ⵉⵎⵇⵓⵔⵏ, ⴷ ⵓⵔⵉⵍⵍⵉ ⴽⵔⴰⵏ ⵓⵙⵏⵓⴼⵍ ⵖ ⵏⵓⵅⴰⴱ ⵙⵉⵢⴰⵙⵉⵢⴰ ⴰⴼⴰⴷ ⴰⴷ ⵉⵜⵢⵓⴼⴼⴰ ⴰⴼⵙⴰⵢ ⵉ ⵍⴰⵣⵎⴰ, ⴷ ⵖ ⵓⵙⴽⵍⵓ ⵏ ⴰⵏⵔⵔⵓ ⵏ ⵍⵎⴰⵚⴰⵍⵉⵃ ⵉⵥⵍⵉⵏ ⴼ ⵍⵎⴰⵚⴰⵍⵉⵃ ⵉⴳⴷⵓⴷⴰⵏ, ⵍⵓⴱⵏⴰⵏ ⵔⴰⴷ ⵜⵙⴽⵔ ⵜⴰⴽⵙⴰⵔⵜ ⵖ ⴽⴰⵢⴳⴰⵜ ⴰⵙⵡⵉⵔ, ⴰⵡⴰⵔ ⵏ ⵍⴰⵣⵎⴰ ⵜⴰⴷⴰⵎⵙⴰⵏⵜ ⴷ ⵜⴰⵙⵔⵜⴰⵏⵜ, ⵀⴰⵢⴰⵖⴷ ⵖⵉⵍⴰⴷ ⵎⵏⵉⴷ ⵏ ⴰⵣⵎⴰ ⵜⴰⵏⴰⵎⵓⵏⵜ, ⴰⵛⴽⵓ ⵏⵓⵔⵉⴷ ⴰⵔ ⵏⵜⴰⵏⴰⵢ ⴰⵙⴼⵙⴰⵢ ⴰⵏⴰⵎⵓⵏ, ⴰⴳⴷⵓⴷ ⵢⵓⵔⵉⴷ ⴰⵔ ⵉⵛⵜⵜⴰ ⵉⵏⴳⵔⴰⵜⵙ ⵙ ⴽⵓⵍⵓ ⵎⴰⵜⵓⵙⵉ ⵜⴰⴳⵓⵔⵉ ⵏ ⵍⵎⵄⵏⴰ, ⵙⵎⴷⴰⵙ ⵓⵍⵍⴰ ⵜⴰⵡⴰⵇⵓⵄⴰⵜ ⵏ ⵣⵉⵢⴰⴷⴰ ⵖ ⵍⵊⴰⵔⵉⵎⴰ, ⴷ ⵍⵎⵓⵄⴷⴰⵍⴰⵜ ⵏ ⵉⵎⵏⵖⵉⵎⴰⵏⵏ, ⴷ ⵍⵉⵜⵉⵊⴰⵔ ⵖ ⵓⴼⴳⴰⵏ, ⴷ ⴰⵊⵊⵍⵓ ⵏ ⵍⵎⴰⵄⴰⵢⵉⵔ ⵍⴰⵅⵍⴰⵇⵉⵢⴰ, ⴷ ⴰⴳⴳⵓⵣ ⵏ ⴰⵎⵏⴰⴹ ⴰⵏⴰⵎⵓⵏ. ⴷ ⵓⵙⵇⵙⵉ ⵍⵉ ⵉⵙⴰⵇⵙⴰⵏ ⴰⴳⴰⵢⵓⵏⵙ ⵉⴳⴰⵜ ⵎⴰⵏⵉⴽ ⵔⴰⵜⴳ ⵍⵓⴱⵏⴰⵏ ⵖⵉⴷ ⵙ ⵎⵔⴰⵡ ⵉⵙⴳⴰⵙⵏ.
ⵙ ⵍⵃⵙⴰⴱ ⵏ ⵜⴰⵇⴰⵔⵉⵔ ⵎⴰⵢⵅⵛⵏ ⵓⵔⵜⵜⴰⴷ ⵉⵍⴽⵎ.
ⵡⴰⵅⴰ ⵓⵔⵏⵣⴷⴰⵔ ⴰⵏⵉⵏⵉ ⵎⴰⵔⴰⴷ ⵉⴳⵓⵔⵓ ⵉⵎⴰⵍ ⵎⴰⵛ ⵍⵃⴰⵍ ⵖ ⵍⵓⴱⵏⴰⵏ ⵏⴰⵃⵢⴰⵜ, ⴰⵛⴽⵓ ⵍⵉⵃⵜⵉⵎⴰⵍⴰⵜ ⵎⵔⵣⵎⵏⵜ ⴷ ⴱⴰⵢⵏⵜ ⴷ ⴰⵎⵣⵡⴰⵔⵓ ⴳⵉⵙⵏⵜ ⴰⵙⴱⴰⵇⴰⵢ ⵉⴳⴰⵏ ⵛⴰⵎⵉⵍ ⵖ ⴽⴰⵢⴳⴰⵜ ⴰⵙⵡⵉⵔ, ⵉⵎⵢⴰⵔ ⵍⵓⴱⵏⴰⵏ ⴰⵢⵜⵅⵍⴰⵙ ⴰⵜⵉⴳ ⵉⴳⵓⵜⵏ ⵙ ⵓⵙⵔⴰⴳ ⵏ ⵜⴰⵃⴰⵍⵓⴼⴰⵜ ⵏⵙ ⵙⵉⵢⴰⵙⵉⵢⴰ ⴷ ⵜⴰⴱⴰⵄⵢⴰ ⵏⵙ, ⴰⵢⵍⵉⴳ ⴰⴽⴽ ⵏⵙⵎⵔⵙ ⵜⴰⴳⵓⵔⵉ ⵏ ⵍⵎⵓⵄⵙⴽⴰⵔ ⵏ ⵜⴰⴳⵓⵜ ⵏ ⴰⴳⵎⵎⵓⴹ, ⴷ ⵜⴰⵙⴳⴰ ⵖⵉⴷ ⵉ ⵎⴰⵔⵔⴰ ⵉⴳⵣⵎⴰⵏ ⵙⵉⵢⴰⵙⵉⵢⴰ ⴷ ⵉⵎⴰⵡⴰⵙⵏ ⵙ ⵃⴰⵙⴰⴱ ⵍⵉⴷⵢⵓⵍⵓⵊⵉⵢⴰ ⵏⵙⵏ ⴷ ⵚⴰⵃⴰ ⵍⵉ ⵙⵉⵙ ⵉⵥⵍⵉⵏ, ⵎⴰⵛ ⵜⵉⴳⵉⵔⴰⵏⵙ ⵢⴰⵏ ⵓⵣⵍⵉⴳ ⵎⴰⵔⵔⴰ ⵍⵉⵖ ⵜⴳⴰ ⵍⴰⵖⵍⴰⴱⵉⵢⴰ ⵏ ⵓⴳⴷⵓⴷ ⵏ ⵍⵓⴱⵏⴰⵏ ⴱⵉⴷⴷⵏ ⵖ ⵉⵡⵜⵜⴰ ⵏ ⵟⴰⵉⴼⴰ.
ⵜⴰⵏⴽⵔⴰ ⵖ ⵍⵓⴱⵏⴰⵏ ⵉⵛⵇⴰ ⴰⵜⵜⵓⵢⵍⴽⴰⵎ, ⴷ ⵓⵔⵉⵍⵍⴰ ⵉⵎⵉⴽ ⵏ ⵓⵏⴰⵔⵓⵣ ⵖ ⵜⵎⴰⵣⵉⵔⵜ ⴰⴷ ⵍⵉ ⵎⵓ ⵉⵅⵅⵍⴰ ⵉⴳⵔ ⵏⵙ ⴰⵥⵕⴼⴰⵏ ⴷ ⵡⵉⵏ ⵜⴰⴷⵓⵙⵉ ⴷ ⵜⴰⴷⴰⵎⵙⴰ ⴷ ⵉⵔⵔⴰⵏ ⴰⵢⵏⵖ ⵓⵍⵍⴰ ⵉⴳⵔ ⵏⵙ ⵏ ⵓⵙⵙⵍⵎⴷ ⵍⵉⵖⴷ ⵢⵓⵔⵉ ⵡⴰⵡⴰⵍ ⵉⴱⴰⵢⵏ ⴼ ⴰⴷⵉⵙⵓⵔⵉ ⵜⴰⵙⴷⴰⵡⵉⵜ ⵜⴰⵏⴰⵎⵓⵔⵜ ⵜⵥⵍⵉ, ⵙⵎⴷⴰⵙ ⵓⵍⵍⴰ ⵍⵇⴰⵎⵄ ⵍⵉ ⵉⵍⵍⴰⵏ ⴼ ⵉⵎⵃⴹⴰⵔⵏ.
ⵜⴳⴰ ⵍⴰⵣⵎⴰ ⵖ ⵍⵓⴱⵏⴰⵏ ⵎⵓⵜⴰⵄⴰⴷⵉⴷⴰⵜ ⵍⴰⴱⵄⴰⴷ ⴷ ⵅⵜⴰⴷ ⴰⴽⵓⵍⵓ ⵉⴳⴰⵏ ⵜⵉⵏⵎⵉⵣⵉⵜ ⵖ ⵏⴳⵔ ⵅⵜⵉⵍⵉ ⴼ ⵏⵣⵔⵉ ⴷ ⵍⵉⵏⵄⵉⴽⴰⵙⴰⵜ ⵏⵙ ⴳⴰⵏ ⵍⵅⴰⵟⴰⵔ ⵖ ⵉⴳⵔ ⴰⴷⴰⵎⵙⴰⵏ ⴷ ⴰⵏⴰⵎⵓⵏ ⵎⴰⵢⴰⴷ ⵙ ⵓⵙⵔⴰⴳ ⵏ ⵍⵀⴰⵛⴰⵛⴰ ⵍⵉ ⵙⴽⵔⵏ ⵉ ⵜⴰⴷⴰⵎⵙⴰ ⵏ ⵍⵓⴱⵏⴰⵏ.
ⴷ ⵓⵔ ⵏⵓⴼⴼⴰ ⴰⵏⵉⵏⵉ ⴰⴱⵍⴰ ⵎⴰⵙⴷ ⵍⵓⴱⵏⴰⵏ ⴰⵔ ⵜⵣⵉⴳⵉⵣ ⵖ ⵓⵖⴰⵔⴰⵙ ⵏ ⵜⴰⵛⵛⴰⵜⵓⵜ, ⴷ ⵍⵎⵉⵄⵢⴰⵔ ⵏ ⵎⴰⵢⴰⴷ ⵉⴳⴰⵜ ⵎⴰⵢⵜⵜⵊⵕⵓⵏ ⵖ ⵜⵉⵎⵙⵓⵜⴰⵍ ⵜⵉⵏ ⴱⵔⴰ ⵓⵍⴰ ⵜⵉⵏ ⵓⴳⵏⵙ, ⴷ ⵉⵖ ⵉⵖⴰⵎⴰ ⵍⵃⴰⵍ ⵙ ⵖⵉⴽⴰⴷ ⴰⵎⵓⵏ ⴽⵓⵍⵍⵓⵜ ⴰⵔ ⵉⵣⵣⵉⴳⵉⵣ ⵖ ⵓⵖⴰⵔⴰⵙ ⵏ ⵜⴰⵛⵛⴰⵜⵓⵜ, ⵙ ⵎⴰⵢⴰⴷ ⵣ ⵖⵉⵍⴰⴷ ⴰⵔ ⵎⵔⴰⵡ ⵉⵙⴳⴰⵙⵏ, ⵉⵇⴷⵔ ⴰⵏⵏⵉⵏⵉ ⵎⴰⵙⴷ ⵍⵓⴱⵏⴰⵏ ⵔⴰⴽⵓⵍⵓ ⵜⵅⵅⵍⵓ ⵖ ⵎⴰⴷⵢⵓⵛⴽⴰⵏ ⵏ ⵉⵙⴳⴰⵙⵏ ⵃⴰⵙⴰⴱ ⵜⵉⵎⵙⵓⵜⴰⵍ ⵏ ⵓⴳⵏⵙ ⴷ ⵍⵉ ⵖⵓⵔ ⵜⵍⵍⴰ ⵢⴰⵜ ⵜⴰⵣⵎⵔⵜ ⵍⵉ ⵉⴳⴰⵏ ⵜⴰⵇⴰⴷⵓⵎⵉⵢⴰ ⴷ ⵉⴳⴰⵏ ⵜⴰⵏⴰⵎⵓⵏⵜ ⵍⵉ ⵉⵜⴼⵔⴰⴹⵏ ⴰⵙⵏⴼⵍ ⵏⵖ ⴰⵔⵜⵄⴽⴰⵙ ⵎⴰⵢⴰⴷ, ⴷ ⵏⴳⵔ ⵜⴰⵎⵙⵓⵍⵜ ⵜⴰⵉⵇⵍⵉⵎⵉⵜ ⵍⵉ ⵉⵍⵍⴰⵏ ⵖ ⵢⴰⵏ ⵙⵉⵔⴰⵄ ⴰⴷⴰⵡⵍⵉ ⵍⵉ ⴱⴷⴷⴰ ⵉⵍⵍⴰⵏ.
ⵏⵍⵍⴰ ⵖⵉⵍⴰⴷ ⴰⵎⵏⵉⴷ ⵏ ⵢⴰⵏ ⵙⵉⴼ ⴷⴰⵔ ⵙⵏⴰⵜ ⵜⴰⵙⴳⵉⵡⵉⵏ ⴰⵎⴰ ⴰⵏⵍⴽⵎ ⵜⴰⴱⴰⵔⴱⴰⵔⵉⵜ ⵏⵖ ⴰⵢⵜⵛⵜⵉⵜ ⵡⴰⵎⵓⵏ ⵎⴰⵢⴰⵏ ⵔⴰⴷ ⵢⴰⵊ ⵍⵓⴱⵏⴰⵏ ⴰⵙⵓⵍ ⵓⵔ ⵜⵉⵍⵉ ⵙ ⵍⵎⵄⵏⴰ ⵏ ⴷⴰⵡⵍⴰ, ⵏⵖⴷ ⵔⴰⵢⵙⵍⴽⵎ ⵉ ⵢⴰⵜ ⵍⵃⴰⵍⵜ ⵏ ⵟⴰⵡⵔⴰ ⵍⵉⵖ ⴰⵏⵙⴰⵡⴰⵍ ⴼ ⵢⴰⵜ ⵟⴰⴱⴰⵇⴰ ⵏ ⴰⵎⵓⵏ ⵍⵉ ⵉⴽⴽⴰⵏ ⴰⴼⵓⵙ, ⵉⵖ ⵜⵥⴷⴰⵔ ⴰⴷ ⵜⴱⵍⵡⵔ ⴰⵡⴰⵍ ⵏⵙ ⴷ ⵜⵙⴽⵔ ⵢⴰⵜ ⵜⴰⵣⵎⵔⵜ ⵜⴰⵏⴰⵎⵓⵏⵜ ⵍⵉ ⵉⵣⴷⴰⵔⵏ ⵉ ⵓⵙⵏⴼⵍ ⵙ ⵜⴰⵖⴰⵔⴰⵙⵜ ⵏ ⵍⴼⴰⵔⴹ ⵏ ⵡⴰⵡⴰⵍ ⵏⵙ ⴷ ⵜⴰⵎⵜⵉⵍ ⵏⵙ ⴰⵙⵔⵜⴰⵏ.
ⴷ ⵓⵍⵍⴰ ⴰⵣⵡⴰⴳ ⵓⵔⵉⴳⵉ ⴰⴼⵙⴰⵢ, ⵏⵍⵍⴰ ⵖ ⵢⴰⵜ ⵜⴰⵎⴰⵣⵉⵔⵜ ⵉⴳⴰⵏ ⵟⴰⵉⴼⵉⵢⴰ ⵓⵔ ⵏⵓⴼⴼⴰ ⴰⵏⴼⵍ ⵍⵓⴱⵏⴰⵏ ⵓⴳⴳⴰⵔ ⵉ ⵟⴰⵡⴰⵉⴼ ⴷ ⵜⵉⵏⴱⴰⴹⵉⵏ ⵏⵙⵏ, ⵉⵇⴰⵏⴷ ⴰⵏⴼⵙⵉ ⵍⵉⵜⵉⴼⴰⵇ ⵏ ⵟⴰⵉⴼ ⵍⵉ ⵉⵙⵙⴷⵓⵙⵏ ⵟⴰⵉⴼⵉⵢⴰ ⴼ ⵜⴰⴷⵖⴰⵔⵉⵜ.
